Acts 26

Bulus Wa Kna Wohin

1Agaribas wa gna Bulus ge, “Gya bye ha gna yi ho ɓeda.” Bulus wa wu obwa, wa ya ɓeda da.

2Wa gna, mi gye mihin tukwo Esu Agaribas nzhin arzikida nu, shi mi ye ma da mihin ɓeda nho abye. 3Ntu gemi kpe lo ge, ho zhin oza nu, n wo kpe Ayahudiyi owa ye ɓedo n ɓa akunnu yi. Nsayi mi gyi ho wye ha kna tnubua.

4“Ayahudiyi kpe lo sarai ge ma ku makaranta Ayahudiyi nya zhin dna Tarsus, avun ma ɓe Urushelima ma ku aɓo zhin dei-dei. 5Ɓa ɓei ɓa ye ɓa da, ɓa kpe lo ge mi zhin Farisiyi nu nwo ta ye ge afua wye n Ayahudiyi owa yi ɓedo nɓa akunnu yi m. 6Ama dalili nkwo zhin ɓai ga mi laifi nyi kwo lo gbo, ɓa ga mi laifi ge mi na wyetu yi ntu alkawali nu ɓo n Shekwoyi ɓo zhin ga eyi azakwoyi nyi. 7A Israilayi abye ngun awo-cei-aba, ɓa zhin atna nyipyei n sukwoyi ge ɓa gye alkawali ye nunu nɓa ʼsa, ama nsayi ɓa la mi ze laifi da. 8Kwo zhin laifi nu ge oza wa ga gaiciya ge efi kala ku lo? Kwo to zhin gaiciya nu ge Shekwoyi n iko yi lo wa je za wye-wyei gan?

9“N ɓei zhin mi gye ngye kwo bmiya lo ma ga aza wahala n ɓa vi Yesu nyi. 10Nɓo ku aza fi n kurkuku n mwa begye n Urushelima, n iko amalami dnagmayi nya yi, esa nɓa da aza owa ofi nya, kwa da mi har ma ye nɓei nɓa zhin nyi.” 11Mi ɓei zhin ma ga a Yesu viyi wahala abaho-baho yi, mi ye ge ɓa na Yesu aɓo. Mi ɓei pyena nɓayi, mi zan ɓa shin azhi yakwo, akniyi gbo-gbo.

12– 13“N wyihoi mi lo ɓa zanshi n Dimashika, mi la izni gwo n malami, dnagmayi, n nyipyei na tukwo, buzangna dnagmayi ndu nyipyei nya, kwa bmiya fi yi ɓedo aza yi nɓa ɓo gnisun n mi yi. 14Eyi vinya ya miya zhi nkni, ma wo begye kwoi daɓo n mi yi n Ibraniyi bye yi, kwoi gna Shawulu, Shawulu kniyi nu zhin hoi ga mi wahala? Ho ga hohin nu wahala.

15“Ma nya ge, ‘nkanu hoi ya?’ Dagayi wa ye ga gna, ‘Omi nu Yesu n ho ga wo wahala nyi. 16Laka! Ntu ge mi la ho kni ha ze mi fyenu n mi saida da yi, ce na zhin mi wu mihin tukwo n ho aba. Ho ɓa gna anyi aɓo ho ku gye, n aɓo n ho ɓa gye, esa n ma wu mihin tukwo n ho aba. 17Nɓa kna ho n ho azaje aba ɓedo abyedo yi. Nɓa tnu ho n abye do aba, 18ha kpe ɓa awye ya, ɓa gye gaiciya ɓa ye abui, ɓa zan-zan dna buzangna Shekwoyi nya, maimakon shetan wyegma, ntu ge ɓa bwa gafara oɓa alaifi nya, ɓa ze gado Shekwoyi nya, ɓedo aza yi abaho-bahoi vinya, oɓa nu a la oɓa alaifi zhan ya ntu ɓa gaiciya ga ɓo omi aba.’

19“Ntu deye ɓo, O esu Agaribas, mi to ɓei na ɓo n ɓewyegye eshe nya yi m. 20Ma ya waʼazi zhin ga aza n Dimashika mi, n Urushelima yi ɓedo n Yahudiya ekni yi, n jesun n abyedo aba, mi-i gna ɓa ge ɓa fwa alaifi ɓa pmibma ɓe Shekwoyi aba, ɓa wu oɓa bmapmi a tnu-tnu manayi. 21A Yahudiyi ɓa wan mi dna aduwa nyakun ntu waʼazi zhin ɓo, ɓai ye ɓa wu mi. 22Ama Shekwoyi wa mi gni, cenu zhin mi gni n wye-wyei n naiye, ma gna aza dnagmayi n aza anawyi yi gaiciya ye. Mi ta wu nyaho lo gbo n nya yi annabi edo n Musa yi ɓei da m. 23Nge Masihu ɓa sin wahala, wa ze oza kmisunyi n wo ɓo laka la evingwo, wa ɓe n buzangna yi na Yahudiyi aba ɓedo n abye do yi.”

24Festus wa da ɓo nkalayi ngye wa kaya nshe, wa ci ge, “Bulus ho la cenya. Oho nyaba nmwa la tukwo pmi ho ya!”

25Ama Bulus wa gna, “Mi ta cenya nu m, Festus duduyi, ama mi da gaiciya nu Behinhin. 26Esu Agaribas kpe aɓeye lo, Mi da ɓeda ye n bugba kala yi, ntu ge aɓeye to zhin aɓo woi-woi nu nwo aba m, ntu ge ato zhin ɓa n vi nu m. 27Esu Agaribas ha ga annabi gaiciya! Mi kpe lo ha ga gaiciya.”

28Agaribas wa gna wo ge, n aɓedeye yi ho ye ma ze Yesu viyi-i? 29Bulus wa ye wa gna, Mi gyi Shekwoyi wye lo omi ɓeda kwa zhin ho ɓedo aza yi vinya nɓa zhi lo ya, ɓa ku ze ngye mi, sai dai to ngye agma n ɓa fi n mi nyi m.

30Sai esu, n gwamna yi, Barniki aza yi vinya ɓa kukala ɓa kunya. 31Shi ɓa ɓo zhin shaula ɓa gna, “Oza deye to zhin laifi n wo ɓa fi ko a dna wo n kurkuku m.”

32Agaribas wa gna Festus ge, wo to ɓei ku gna ge, wo ɓa lo n ɓeda yi n Kaisar aban, o la wo loya.